فیڈرل بورڈ آف ریونیو (ایف بی آر) نے آزاد کشمیر کے ٹیکس استثنیٰ والے علاقوں سے آنے والی مال بردار گاڑیوں کی مؤثر نگرانی کے لیے دو نئی چیک پوسٹس قائم کی ہیں۔
اس اقدام کا مقصد ٹیکس قابل علاقوں میں داخل ہونے والی سپلائز کی سخت جانچ پڑتال اور تمام سامان کے ساتھ درست دستاویزات کی موجودگی کو یقینی بنانا ہے۔
ایف بی آر کی جانب سے جاری نوٹیفکیشن کے مطابق ایک چیک پوسٹ کوہالہ پل پر قائم کی گئی ہے، جو مظفرآباد سے مری اور ایبٹ آباد کی سمت آنے والے راستے پر واقع ہے۔
دوسری چیک پوسٹ ناکودر، دینہ منگلا روڈ (میرپور) کے قریب جی ٹی روڈ کی جانب قائم کی گئی ہے۔
نوٹیفکیشن S.R.O. 2185(1)/2025 کے مطابق یہ چیک پوسٹس سیلز ٹیکس رولز 2006 کے رول 69F اور سیلز ٹیکس ایکٹ 1990 کے سیکشن 40D کے تحت قائم کی گئی ہیں۔
حکام کے مطابق ان چیک پوسٹس کا بنیادی مقصد سامان اور متعلقہ دستاویزات کی پڑتال کرنا ہے تاکہ ٹیکس قوانین پر عمل درآمد کو یقینی بنایا جا سکے، خصوصاً اُن سپلائز کے لیے جو ٹیکس فری زونز سے آتی ہیں۔
اب ان علاقوں سے آنے والی گاڑیوں کے لیے ضروری ہوگا کہ وہ اپنے سامان کی مکمل اور درست دستاویزات ہمراہ رکھیں۔
ایف بی آر نے متعلقہ ریجنل ٹیکس دفاتر کو ان چیک پوسٹس کے قیام اور نگرانی کا اختیار دے دیا ہے، جبکہ ان لینڈ ریونیو انسپکٹرز کو گاڑیاں روکنے، سامان کی جانچ کرنے اور کاغذات چیک کرنے کا اختیار حاصل ہوگا۔
ایف بی آر کا کہنا ہے کہ یہ اقدامات ٹیکس استثنیٰ کے غلط استعمال کی روک تھام اور سپلائی چین کی مؤثر نگرانی کے لیے کیے گئے ہیں۔
ایف بی آر نے غیر ٹیکس شدہ علاقوں سے آنے والے سامان کی نگرانی کے لیے نئے چیک پوسٹس قائم کر دیے
About the Author
