ی بی ایل

پاکستان کے جارح مزاج فاسٹ بولر حارث رؤف نے میلبورن ڈربی کے دوران بگ بیش لیگ (BBL) کی تاریخ میں اپنا نام سنہری حروف میں لکھوا لیا۔ وہ ٹورنامنٹ میں سب سے تیزی سے 50 وکٹیں حاصل کرنے والے بولر بن گئے ہیں۔

حارث رؤف نے یہ سنگِ میل میلبورن رینیگیڈز اور میلبورن اسٹارز کے درمیان جاری میچ میں عبور کیا، جہاں ان کی 50ویں بی بی ایل وکٹ جیک فریزر-میکگرک کی صورت میں حاصل ہوئی۔ بعد ازاں انہوں نے ول سدرلینڈ کو بھی آؤٹ کر کے اپنی مجموعی وکٹوں کی تعداد 30 میچز میں 51 تک پہنچا دی۔

اس سے قبل بی بی ایل میں سب سے کم میچز میں 50 وکٹیں لینے کا ریکارڈ جان ہیسٹنگز کے پاس تھا، جنہوں نے یہ کارنامہ 38 میچز میں انجام دیا تھا۔

میلبورن اسٹارز کی جانب سے بولنگ کرتے ہوئے حارث رؤف نے چار اوورز میں 31 رنز دے کر 2 وکٹیں حاصل کیں اور رینیگیڈز کی اننگز کے دوران اہم کامیابیاں دلائیں، جب وہ اسکور کو آگے بڑھانے کی کوشش کر رہے تھے۔

حارث رؤف اس وقت ٹورنامنٹ کے سب سے زیادہ وکٹیں لینے والے بولر ہیں، جنہوں نے 8 اننگز میں 15 وکٹیں حاصل کر رکھی ہیں۔

دوسری جانب، رینیگیڈز کے وکٹ کیپر بلے باز اور حارث رؤف کے قومی ٹیم کے ساتھی محمد رضوان بیٹنگ میں نمایاں کارکردگی نہ دکھا سکے اور 20 گیندوں پر 21 رنز بنا کر اسٹارز کے کپتان مارکس اسٹوئنس کی گیند پر آؤٹ ہو گئے۔

اننگز کے اختتام پر میلبورن رینیگیڈز نے 20 اوورز میں 7 وکٹوں کے نقصان پر 166 رنز بنائے، اور میلبورن اسٹارز کو ڈربی جیتنے کے لیے یہ ہدف دیا۔